Крводарување во Гостивар во спомен на хуманоста на д-р Трајче

Во Гостивар во тек е крводарителната акција, која е во склоп на тридневните активности организирани од страна на Хуманитарното здружение „Д-р Трајче Нешковски“, со цел потсетување на ликот и делото на младиот гостиварец кој прерано замина од овој свет.

Во акцијата, која се организира во спортската сала на гимназијата од утрово се вклучуваат голем број граѓани, како потврда дека солидарноста и хуманоста се вредности што секој човек треба да ги негува.

„Денес дарував крв во чест на Трајче, кој на сите нас ќе ни остане во сеќевање како човек со големо срце и хуманост кои секојдневно ги покажуваше. Би ги повикал сите што се во можност да ја поддржат акцијата и да бидат дел од ова крводарување, со што може да се спасат човечки животи“, рече триесет и седумгодишниот гостиварец Петко Јовицоски.

Секој што сака да дарува крв, може да учествува во акцијата која ќе трае до 15 часот.

Активностите во чест на д-р Трајче започнаа вчеравечер со забава од хуманитарен карактер, а ќе се заокружат утре со Меморијален спортски турнир, исто така во салата на гимназијата, со почеток од 12 часот.