КУП 2019: КК Гостивар – Фени Индустри вечерва од 20:15 часот (ТВ пренос)

Започнува завршницата на 27. издание на некогаш најмасовното кошаркарско натпреварување кај нас, кошаркарскиот КУП на Македонија.

Кошаркарскиот клуб Гостивар својот поход го започнува вечерва од 20 часот и 15 минтуи. Прв противник на „бело-сините“ е екипата на Фени Индустри од Кавадарци. Амбициозна екипа која во првенството во два наврати го намачи Гостивар и во самата завршница го испушти местото во Супер лигата. Единствен успех на кој може да се надеваат кавадарчани сезонава е КУП натпреварувањето.

Гостиварци, влегуваат во КУП завршницата после важната победа против Блокотехна во Супер лигата, победа која сигурно ќе ја зголеми самодовербата кај избраниците на Марјан Србиноски. Иако не по нивна желба, кошаркарите имаа само еден ден одмор пред годинешното КУП натпреварување. Дополнителна ситуација кај гостиварци е што МКФ го суспендира Џо Фурстингер за овој четвртфинален дуел, на натпреварот со Блокотехна поради фаул без топка, доби директно исклучување, еден натпревар суспензија и 30.000 денари парична казна.

Но, и покрај сето тоа никој од гостиварскиот клуб не се предава однапред, сите знаат дека нема да биде ни малку лесно. Желни да остварат што подобар успех на овој турнир кошаркарите најавуваат голема борба и максимална пожртвуваност.

Подобриот од овој дуел, во полуфиналето ќе се сретне со победниот од Блокотехна – КК АВ Охрид, натпревар кој е закажан за во сабота од 17 часот.

МРТВ ќе врши директен пренос од овој четвртфинален дуел.