Куп ѓубре и чад кај старите касарни во Гостивар, граѓаните реагираат

На локација близу старите касарни во Гостивар, деновиве никна дива депонија. Граѓаните реагираа посочувајќи дека во неколку наврати ѓубрето гореше, а чадот и миризбата се чувствуваат до самиот град.

На местото, како и покрај патот, може да се забележи насобран комунален, но и градежен смет, стар мебел, облека, искршени стакла и слично. Во некои делови ѓубрето се уште чади.

Одговор за тоа што се случува и зошто локацијата е преполнета со отпад, побаравме од надлежните за екологија во гостиварската општина.

„Граѓаните не‘ алармираа дека таму гори и ние отидовме на терен да видиме за што се работи. Увидовме дека на локацијата има комунален отпад, кој се запалил. Од ЈП „Комуналец“ дознавме дека, направиле алтернативен, привремн пункт за одлагање на отпадот, поради тоа што не можеле да стигнат до Русино, заради работите на патот.  Направивме и увид на изградбата на патот до Русино, да видиме дали е завршена. Патот не е дефинитивно пуштен во употреба, но е проооден и ќе може да го користат камионите.“, појасни Зуди Џелили, раководител на општинскиот сектор за заштита на животната средина.

Според неговата изјавата, „Комуналец“ ќе го префрли отпадот од локацијата на Русино и кај касарните веќе нема да се фрла ѓубре.

„Мислам дека тоа ќе биде за кратко време, не се работи за голема количина, со неколку камиони ќе се префрли отпадот до Русино. За во иднина, колку што сум информиран, градоначалникот има убав план за таа локација да прерасне во индустриска зона“, рече Џелили.