Лани регистрирани десетина напади на полицајци

Во текот на минатата година, на подрачјето на Секторот за внатрешни работи Тетово кој го покрива и гостиварскиот регион, биле регистрирани десетина напади на овластени службени лица. Споредено со претходната година тоа се четири помалку.

Повеќето од нив се случиле во град, а два биле во селата. Шест биле извршени поединечно, а останатите здружено со учество на две или повеќе лица.

Според информациите од СВР, најголемиот број од нападите биле извршени при лишување од слобода или легитимирање на напаѓачите. Во еден случај било употребено и огнено оружје.

Тројца полициски службеници, завршиле со тешки телесни повреди, а 12 со лесни повреди. Сите случаи се целосно расчистени и заокружени со кривични пријави против инволвираните, кои се соочиле со законски предвидените санкции, соопштуваат надлежните.

Лани, биле пријавени и 28 омаловажувања на овластени службени лица.  Навредувањата и омаловажувањата во најголем број биле при преземање мерки и активности во сообраќајни контроли.