Легализација на дивоградби во Гостивар: Елаборатите да се достават до 31-ви декември

Рокот за доставување на геодетските елаборати за граѓаните кои барањата за легализација ги поднеле во 2011-та година, истекува на 31-ви декември, потсети денес на прес конференција, Секторот за урбанизам на општина Гостивар.  Надлежните велат дека неодамнешните најави од државниот Катастар за продолжување на рокот не се официјални, до сега немало измена на законската рамка и се` уште важат претходно определените рокви. Од Секторот за урбанизам ги повикаа сопствениците кои ги немаат комплетирано документите со елаборат, да го сторат тоа до крајот на неделава.

-Ги повикуваме сите граѓани на општина Гостивар, посебно печалбарите, кои се дојдени во родниот крај овој период да ги достават геодетските елаборати до крајниот рок, а тоа е 31-ви декември, рече раководителот на Секторот, Јетон Салија.

Податоците зборуваат дека во општина Гостивар биле поднесени вкупно 12.734 барања за легализирање на дивоизградени објекти. Од нив, целосно се решени 4.165. Останатите се во постапка: за дел треба да се донесе одлука за вклопување во урбанистичка планска документација, за дел се чека сопствениците да ја платат сумата за легализирање и дел треба да ја дополнат документацијата. 

Сопствениците на дивоградби кои барањата за легализација ги поднеле во 2015 и 2016-та имаат рок за комплетирање со елаборати до крајот на идната година.