Легализирани 28 муслимански верски објекти на подрачјето на Гостивар

Дваесет и осум верски објекти низ селата и во градот Гостивар, сопственост на Исламската верска заедница добија решенија за легализација. Документите на муфтијата Шаќир ефенди Фетаху, денес му ги врачи градоначалникот Арбен Таравари.

„Ова беше барање на Исламската верска заедница од пред една година и чест и задоволство ми е што го исполнуваме. Се работи за 22 џамии, две училишта-мектебе и 2 теќиња.“, рече градоначалникот.

Муфтијата Фетаху изрази благодарност до општината што излегла во пресрет на барањата и истакна дека овој чекор е од особено значење за муслиманските верници и доаѓа во празнична атмосфера.

„Значењето е големо, затоа што ова се случува токму во месецот Рамазан, пред најголемата ноќ, Ноќ на Кадр, што симболизира знаење, наука, солидарност, хуманост, мир. Така овој празник ќе се запамети како ден кога се легализирале објекти што се многу важни за организирање на верскиот живот“, изјави Фетаху.

Еден од легализираните објекти е и зградата на Саат Џамијата, кадешто е сместено Муфтиството во Гостивар. Низ селата се опфатени џамии во Симница, Корито, Бањица, Речане, Вруток, Лакавица и други.