Легендарниот стадион Сан Паоло во Неапол, ќе го носи името на Марадона

Денес, градоначалникот на Неапол, Луиџи Де Магистрис, ја започна формалната постапка за преименување на стадионот Сан Паоло во Диего Марадона.

Градоначалникот се одлучи на тој потег по смртта на легендарниот фудбалер на Наполи и аргентинската репрезентација. Диего, почина вчера на 60 годишна возраст од срцев удар.

“Започнавме уште утрово, ги презедовме првите чекори да го посветиме стадионот во Неапол на Марадона. Тоа е процес, но тоа ќе биде брз процес, бидејќи кога ќе има толку силна желба, ништо не може да не спречи. Се надеваме дека ќе се совпадне со враќањето на навивачите на стадион “, рече Де Магистрис.

Градот е сопственик на стадионот Сан Паоло, каде Марадона го предводеше Наполи до единствените две шампионски титули во Серија А, во 1987 и 1990 година.

Наполи вечерва ќе игра против Ријека во Лигата на Европа пред празни трибини поради пандемијата на вирусот корона.

Навивачите се собраа синоќа, во текот на ноќта и утрово пред стадионот да оддадат почит на Марадона, пеејќи песни, веејќи знамиња и шалови и запалија безброј факели, иако собирите се забранети бидејќи Неапол е прогласен за црвена зона поради пандемијата.

На насловната страница од денешниот број на водечкиот весник од Неапол, „Il Mattino“ стои напишано „Grazie“.

Додека најголемиот италијански спортски весник „Gazzetta dello sport“ ги посвети првите 23 страници на легендарниот фудбалер.