Лекарите со препораки: Не тргнувајте на летување невакцинирани, има епидемии на морбили во Грција, Косово, Албанија, Бугарија…

„Граѓаните што ќе одлучат летниот одмор да го поминат надвор од границите на Македонија, треба да ги знаат ризиците по здравјето како и начините за превенција. Без разлика каде одите – планински предели, плажи или раздвижени градови – започнете ја вашата авантура подготвени“, порачуваа од Институтот за јавно здравје, излегувајќи со препораки за заштита од заболувања при патување.

Надлежните советуваат пред патувањето, граѓаните да се запознаат со дестинацијата и со  можноте здравствени ризици.

„Контактирајте го Центарот за јавно здравје надлежен за местото каде живеете за да добиете информација за тоа дали ви се потребни некои лекови или дополнителни вакцини за дестинацијата каде ќе патувате. Исто така, доколку спаѓате во групата на лица кои имаат хронични заболувања (заболувања на органите за дишење, срцето, црниот дроб, бубрежни заболувања, дијабет, намален имунитет од било кое заболување) побарајте совет од вашиот матичен лекар или специјалист, кој ќе го процени ризикот од патувањето“, стои во соопштението.

Од Институтот потсетуваат дека во повеќе земји од соседството и во други популарни дестинации  (Грција, Србија, Косово, Албанија, Бугарија, Хрватска, Италија, Франција, Шпанија, Португалија и многу други европски земји) во моментов има епидемии на мали сипаници, поради што потсетуваат дека не треба да се патува без заштита, односно невакцинирани.

Институтот за јавно здравје им препорачува на сите патници да го проверат својот вакцинален картон и вакциналните картони на своите деца, за да се сигурни дека се целосно вакцинирани согласно Календарот за имунизација, вклучувајќи и две дози со вакцина против мали сипаници, или соодветно на возраста.

Препораките на ИЈЗ за време на патувањето се:

• Конзумирајте безбедна храна и вода за пиење.
• Јадете само храна која е добро зготвена и се служи веднаш (топла).
• Јадете овошје и зеленчук што сте го измиле со безбедна вода или сами сте го излупиле.
• Пијте вода или газирани пијалаци кои се флаширани и запечатени или многу топло кафе или чај.
• Користете мраз направен од флаширана или дезинфицирана вода.
• Мијте ги рацете често и долго со сапун и вода.