Лекарска комора: Третиот ковид бран зема замав, потребни се плус рестриктивни мерки

Лекарската комора упати апел и ги повика сите граѓани да ја препознаат сериозноста на ситуацијата од ширењето на ковид-19 и со заеднички придонес да им помогнат на лекарите во борбата за заштита на индивидуалното и колективното здравје.

„Потенцираме дека ние лекарите, како здравствени професионалци, на прво место ја имаме грижата за пациентите, бидејќи тоа е предизвикот кој сме го одбрале. Но, во исто време чувствуваме обврска и должност да предупредиме дека се наоѓаме во исклучително сериозна состојба, од која може да излеземе само ако сите почнеме одговорно да се однесуваме и да ги почитуваме мерките за заштита. Треба да сфатиме дека секој од нас и сите ние заедно, преку своите постапки, можеме значително да влијаеме на намалување на бројот на новозаболени и на тој начин да се заштитиме себеси, нашите семејства, пријатели, колеги и сите други граѓани. Со доследно и трајно спроведување на мерките за заштита може да го спречиме ширењето на вирусот, а со тоа и долго и тешко лекување на компликации, загуба на животи и уривање на здравствениот систем.

Ве повикуваме да ни помогнете во борбата со вирусот, преку држење на безбедна дистанца, носење заштитна маска, почесто миење на рацете и одбегнување на групирања и собирања, особено во затворен простор.“, се вели во соопштението од комората.

Од таму, бараат надлежните да размислат за воведување на дополнителни рестриктивни мерки.

„Апелираме и до Комисијата за заразни болести сериозно да го земе предвид воведувањето на дополнителни рестриктивни мерки и протоколи. Свесни сме за фактот дека овие мерки се крајно непопуларни, но во интерес на одржливост на болничките капацитети и зачувување на јавното здравје, како здравствени професионалци, сметаме дека нивното воведување е повеќе од потребно. Само со холистички пристап и земање на сите фактори предвид и со промптна реакција на сите полиња можеме целосно да се избориме со вирусот.“, смета Лекарската комора алармирајќи дека третиот бран на вирусот зема голем замав и веќе на дневно ниво се регистрираат над 1.000 заболени, а паралелно растат и бројките на пациенти кои поради сериозноста на здравствената состојба и компликациите предизвикани од ковид-19 имаат потреба од болничко лекување.