„Летал“ по патот Тетово-Гостивар со над 200 километри на час

Полицијата вчера (3 јануари) на радар фатила автомобил кој по патот Тетово-Гостивар се движел со брзина од 212 километри на час. Ова е еден од 120 возачи откриени во акциската контрола за брзина на возење која на подрачјето на СВР Тетово била спроведена во периодот од 12 до 20 часот. Од вкупно откриените и законски санкционирани 120 возачи кои ја пречекориле дозволената брзина, 101 биле на поширокото тетовско и 19 на гостиварското подрачје. Покрај тоа, при контролата биле откриени и 3 други видови прекршоци.

МВР информира дека исто така, во текот на вчерашниот ден во овој период реализирана е и акциска контрола за управување возила под дејство на алкохол. Во оваа акција санкционирани биле 4 возачи во Тетово, кои управувале возило со присуство на алкохол повеќе од дозволеното, а констатирани се и 48 други видови прекршоци (ТЕ-32 и ГВ-16), од кои најмногу управување без возачка дозвола, возачи-почетници и така натаму.