Летна крводарителна акција на трансфузиологија во Гостивар

Гостиварци повторно покажаа дека се хумани и подготвени да излезат во пресрет на оние на кои им треба помош. Во службата за трансфузиологија во Гостивар, денес се одржа летна крводарителна акција, која вообичаено се спроведува овој период од годината, во сорабока со општинската организација на Црвениот Крст.

Летото, поради годишните одмори важи за критичен период, кога се работи за резерви на крв и крвни продукти. И покрај тоа, големи проблеми не се јавуваат, а кога има недостиг од некои крвни групи се обезбедува крв во краток рок, велат од трансфузиологија.

„Нашата служба е добро снабдена со крв и крвни продукти, некогаш може да се јави недостаток на негативните крвни групи, но се снаоѓаме, повикуваме крводарители и за кратко време го услужуваме пациентот кој има потреба. Инаку секојдневно по 5-6 редовни крводарители даруваат крв кај нас“, вели трансфузиологот д-р Кадри Елези.

Крвта е незаменлив лек, и е потребна секојдневно за да се продолжат животи. Проверете го своето здравје и дарувајте дел од својата крв, порачаа организаторите на денешната акција.