Леуново подготвено за вековната традиција на прослава на Голема Богородица

Во пресрет на 28 август, најголемиот празник за село Леуново, Успение на Пресвета Богородица, подготовките за прославата се во завршна фаза.

„Празникот Голема Богородица во село Леуново се негува од памтивек, нашите предци како така успеале да ја зачуваат оваа традиција низ вековите, сега обврската е наша. Ние сме сега должни да ја одржуваме и пренесеме оваа чест на нашите наследници. Како и секоја година така и оваа подготовките за празникот се започнати од поодамна, се средува просторот околу црквата, се чисти црквата, се вршат последните набавки, за се` да помине како доликува и како тоа го правеле леунци низ вековите. Ги повикуваме сите леунчани, како и сите верници и пријатели на селото, да присуствуваат на овој најголем ден во годината во Леуново“. Во оваа прилика би сакале да ги повикаме сите леунчани и останати верници кои сакаат да придонесат, да се пријават за служење во црквата на овој голем ден, вели Димитрије Лазаревски, претседател на црковниот одбор на с.Леуново.

Во предвечерието на празникот, на 27 август ќе има вечерна литургија од 18:30 часот. Утринска литургија на 28 август ќе започне во 08:30 часот со пеење лепче на леунчани и сите останати кои ја слават славата. Традиционалниот народен собир ќе започне од 10 часот.

Празникот Голема Богородица во село Леуново се негува векови наназад, евидентирани записи има од 1866 година кога е отпочната градбата на оваа црква. Пресвета Богородица е заштитничка на селото Леуново и затоа се празнува како селска слава.

Годинава одбележувањето на Успение на Пресвета Богородица, започна со пливачкиот маратон „Леуново 2о19“, кој се одржа во недела во чест на овој празник во Леуново.