Ликовен хепенинг со дечиња во Гостивар по повод Денот на Ромите

Во чест на Меѓународниот ден на Ромите кој се одбележува на 8-ми април, претпладнево на градскиот плоштад во Гостивар се одржа настан со ликовни и музички активности со дечињата од ромска националност од гостиварските градинки. Децата го цртаа ромското знаме и низ музика учеа за својата традиција и култура.

„Дојдовме со убава порака, нашата цел за оваа активност што ја организираме е да ги запознаеме малите деца кои се Ромите, која е нивната историја, традиција, култура, убавата музика. Сето тоа што ги прави да имаат достоинствен и убав живот во Гостивар, да го почитуваат тоа, како и да го негуваат својот мајчин јазик со генерации. Пораката од денешната активност е дека децата од рана возраст треба да си ги знаат своите права и обврски, прво како деца, а кога ќе пораснат да бидат граѓани кои ќе придонесуваат за заедницата пред се, а потоа и за општеството. Тука сум како претставник од градинка, но сум горда што сум Ромка и што бев дел од проектот Инклузија на деца Роми, а сега вработена како воспитувач.“, рече Миневер Скендери, воспитувачка во градинките во Гостивар.

Проектот Инклузија на деца Роми во гостиварските градинки се спроведува од 2006-та година. Скендери оцени дека има позитивни ефекти и дека со тек на времето расте интересот на родителите од ромска заедница да ги носат своите деца во установите.

Актуелно градинките во Гостивар ги посетуваат петнаесетина дечиња од ромска националност.