Литературен конкурс за основците од гостиварските училишта

Основците од вишите одделенија од училиштата на подрачјето на општина Гостивар добиваат можност да го покажат својот талент во пишување и креативна мисла. Средното економско училиште распиша конкурс за литературни творби, поезија и проза, на тема „Влијанието на социјалните мрежи врз животот на младите”. Право на учество имаат сите ученици од основните  училишта од шесто до деветто одделение со творби напишани на својот мајчин јазик.

„Преку овој литературен конкурс сакаме да ги потсетиме учениците на вредноста на пишаниот збор и литературата и кај нив да го поттикнеме творечкиот дух. За најдобрите се обезбедени пригодни награди“, велат организаторите на конкурсот.

Творбите се доставуваат дирекно во средното економско училиште, со назнака – за литературниот конкурс, или преку мејл: seou.literaturenkonkurs@gmail.com. Учесниците треба да го наведат името на ученикот, менторот и на училиштето.

Конкурсот е отворен до 16 април, а наградите за најдобрите творци ќе се доделуваат на свеченост во просториите на училиштето кон крајот на месецот.