Литературна средба на основци од Гостивар со писателот Горјан Петревски

Учениците од гостиварското основно училиште „Гоце Делчев“ имаа убава и корисна можност да поразговараат и да се дружат со познатиот писател на книги за деца и млади Горјан Петревски. Основците одблизу се запознаа со авторот чии дела ги читаат како задолжителни лектирни изданија, му поставуваа прашања и се мотивираа повеќе да читаат книги.

Литературната средба ја организираше здружението за култура „Анисија“ во склоп на проектот „Авторот и детето“.

„Петревски во училиштето беше пречекан со големо воодушевување. Децата од нижите оделенија направија и прекрасен пречек со пригодна програма. Голема благодарност за соработката до директорката Гордана Мојсоска и библиотекарката Валентина Николоска  како и на останатиот наставен кадар кој учествуваше во активноста. Се надеваме дека и во иднина ке имаме вакви соработки од областа на образованието кои се во интерес на учениците и училиштата.“, велат од здружението.

Писателот Петревски пред учениците од седмо и осмо одделение даде осврт на неговите почетоци од авторството, говореше за инспирацијата во неговите дела и за нивната сограганка и соученичка со која почнува книгата „Споменка“. На учениците им беа откриени и содржините на делата на кои авторот работи во моментов.

Од страна на организаторите на авторот, директорката, библиотекарката и дел од наставниот кадар им беа доделени благодарници, а на учениците пригодни подароци. Учениците пак, од одделението на наставничката Анета Казиоска во оваа прилика подарија лектирни изданија за училишната библиотека