Литературно читање и доделување на награди во економското училиште во Гостивар

Со цел да се поттикнат младите на креативност, да го негуваат пишаниот збор, како и натпреварувачкиот дух, средното економско училиште во Гостивар организираше Литературен конкурс за поезија и проза. Учениците од гостиварските училишта твореа на интересна и актуелна тема: „Влијанието на социјалните мрежи врз животот на младите”, а оние кои комисијата ги избра како најдобри, денес добија награди и ги читаа своите творби на настан што се организираше во училиштето.

Професорите оценуваат дека интерес за пишување кај учениците има, но дека им се потребни мотивација и поттик.

„Ме радува што навистина имаше голем интерес. Од вкупно 30 пристигнати творби, во втор круг влегоа 15 и од нив ги избравме најдобрите. Се доделуваат прво, второ и трето место на трите јазици: македонски, албански и турски јазик“, изјави Габриела Петроска, професор по македонски јазик во средното економско училиште.

Први места понесоа: Влора Весели, Назар Хамди и Михаела Антеска. Второ место освоија: Медине Фетаи, Деспина Даниловска и Влера Зеќири, додека трето: Теодора Матеска, Дилан Хусеин и Зилфи Асани. Учениците добија дипломи и книги.

На останатите шест кои влегоа во потесната селекција им беа доделени благодарници.