Литературно читање на ДПМ во Гостивар, ученици се дружеа со писатели и поети

Децата што почесто да се дружат со книгата, а авторите и професорите да ги мотивираат да стекнуваат читачки навики. Ова беше пораката испратена од денешниот настан кој се одржа во Гостивар во организација на Друштвото на писатели на Македонија, со литературно читање и претставување на пет писатели и поети пред основци и средношколци.

„Среќни сме што сме денеска во Гостивар, и во соработка со библиотеката го организираме ова литературно читање. Овој настан е по повод 75 години постоење на ДПМ. Имаме средба со учениците од основните и средни училишта и ни претставува големо задоволство и вистинска радост што градот Гостивар ги отвори своите врати за нас. Со ваквите настани повторно сакаме да се вратиме кај читателите, особено најмладите.  Некако како да заборавивме дека читателите се создаваат од најмали нозе, па затоа одлучивме дека треба што почесто да бидеме меѓу најмладите и да организираме посети во домови на култура, библиотеки, училишта и градинки. Она што посебно не‘ радува е што Гостивар не е само развиен град стопански, туку е и град на културата’, рече Христо Петрески, претседател на ДПМ.

Покрај Петрески на литературното читање учествуваа: Кристина Николовска, писателот за деца и млади Горјан Петревски, Сена Ариф, како и поетот од Гостивар Лулзим Хазири.

Од ДПМ најавија дека овој карван ќе продолжи и во другите градови низ земјава.