Лоша година за Гостивар, драстично помалку новороденчиња

Се‘ поретко се слуша бебешкиот плач во Гостивар. Трендот на опаѓање на наталитетот кој трае скоро деценија и половина, продолжи и годинава во уште полош правец. Од 1-ви јануари заклучно со денес (5 ноември) на гинеколошко-акушерското одделение во гостиварската болница се родиле 445 бебиња. Споредено со истиот период од минатата година ( 1 јануари-5 ноември), тоа е 78 новороденчиња помалку.

„Загрижувачки е, ние секоја година наназад десетина години имаме тренд на паѓање, но оваа година е доста повеќе. Зошто е тоа така, не може точно да се каже, тука улога играат повеќе фактори. Хипотетички, може да кажам дека се должи на миграцијата, секако на ковид пандемијата и економските услови поради кои младите не се решаваат да формираат семејство.“, вели д-р Агим Јакупи, раководител на одделението.

Растечки тренд има и во однос на начинот на кој биле извршени породувањата. Дури 53% од родилките во Гостивар донеле бебе на свет со царски рез.

„И во овој поглед има растечки тренд. Некаде 53% се породувања со царски рез. Така е и во светот, па и ние не сме исклучок. Некогаш и ние како медицински тим, мора да ги сослушаме потребите и барањата на пациентките“, вели д-р Јакупи.

Минатата година, во Гостивар беа родени 583 бебиња, а во 2019-та, 622.