Лошите мисли, носат лошо здравје – сте слушнале ли за носибо ефект?

Нераскинливата врска меѓу умот и телото е докажана многупати. Прашањето е како човекот ќе ја искористи и кон каде ќе ги насочи својата енергија и мисли.

На сите ни е познат пласибо ефектот. Многу моќна метода на лекување која се користела во минатото, но и денес во модерната медицина. Под сугестија дека му е даден лек кој ќе делува против болеста, пациентот оздравува. А всушност пиел обични витамини.

Обратно на пласибо постои носибо ефект. Верувањето дека ќе се случи нешто лошо со нашето здравје и дека нема да оздравиме го прави токму тоа – влошување на здравствената состојба. Заради сериозноста која носибо ефектот може да ја има врз пациентите, психијатрите нагласуваат дека лекарите при третман на болестите, мораат да обрнат повеќе внимание на тоа: начинот на комуникација со пациентот, соопштување на лоши вести, прогноза на лекување и сл. Артур Барски, познат психијатар во болницата Бригам во Бостон како пример го дава експериментот со аспирин кој како средство за разредување на крвта им бил даван на пациенти со срцеви заболувања. Несаканите ефекти биле зголемини кај пациентите кои претходно биле предупредени на нив. Доколку им биле укажани можни проблеми со желудникот при употребата на аспиринот, скоро секогаш истите пациенти добивале болки во желудникот, за разлика од оние кои што не биле предупредени.

За жал, двојно повеќе сме подложни на негативни сугестии. Истражувањата покажале дека пласибо ќе се јави кај 30 до 50% од пациентите, додека носибо од 55 до 100 % од случаите.