Ловџиите да го почитуваат законот, полицијата и инспекциите ќе ги засилат контролите!

Викендот што измина на поширокото полошко подрачје официјално беше отворена новата ловна сезона. Со цел  навреме да се превенираат, односно пресретнат незаконските постапки на поединци, но  и ловџиите  поблиску да бидат информирани за последиците од таквите постапки, Секторот за внатрешни работи Тетово апелира доследно да се почитува Законот за лов.

Санкциите за непочитување на одредбите од Законот за лов се ригорозни и доследно и без исклучоци ќе се применуваат кон сите подеднакво, без разлика дали станува збор за ловџии-почетници или за искусни ловџии, нагласуваат од СВР.

„Ловџиите од Полог се потсетуваат, исто така, дека незаконит лов претставува кривично дело, за кое се предвидени парични и казни затвор од шест месеци до три години, зависно од тоа –кога, каде и што  е отстрелано.  На ловџиите им се укажува да бидат докрај внимателни при ракувањето со оружјето што го поседуваат  и носат со себе на лов за да не ја доведат во опасност сопственaта и безбедноста на другите, но и да не го даваат оружјето на други лица.“, се вели во соопштението на полицијата.

Со започнувањето на новата сезона,  Секторот за внатрешни работи Тетово најави дека во соработка со другите служби, значително ги засили контролите низ ловиштата на подрачјето и презема соодветни мерки и активности за спречување и санкционирање на незаконскиот лов.