Македонија вечерва против Франција на Светското ракометно првенство

Македонската ракометна репрезентација вечерва ќе го одигра последниот натпревар од главната фаза на Светското првенство, каде противник ќе биде силната селекција на Франција.

Нашата репрезентација моментално е на третото место во групата со четири бода, исто колку и Австрија. Пред почетокот на мечот, ќе бидат познати сите можни калкулации за пласман понатаму, бидејќи претходно ќе се одиграат дуелите Холандија – Австрија и Катар – Унгарија.

Франција, како фаворит во групата, веќе го обезбеди првото место и има простор да ротира во составот, што може да биде мала предност за македонскиот тим.

„Франција е една од најдобрите селекции во светот. Ние ќе се обидеме да одиграме квалитетен натпревар. Треба да веруваме во тоа што работиме и да се фокусираме на сопствената игра,“ изјави селекторот Кире Лазаров.

Македонските ракометари досега покажаа борбеност на теренот, а јавноста очекува да дадат максимум и вечерва, без разлика на конечниот резултат. Натпреварот ќе започне во 20:30 часот во Вараждин Арена.