Македонија во спомен на 59-те жртви во пожарот, собир и на плоштадот во Гостивар

Низ повеќе градови во Македонија вечерва се одржаа собири на граѓани во спомен на жртвите од трагичната несреќа во Кочани. Граѓаните излегоа да изразат поддршка и грижа во овие најтешки моменти.

Во Скопје собирот почна со 16 минути молк. Присутните изразија сочувство и заедништво создавајќи ѕвездено небо со мобилните телефони, запалија свеќи и оставаа цвеќиња.

Низ транспарентите како „Народот страда додека системот одмара“, „Грутка во грлото, солзи во очите, не сте сами“, „Корупција пали, невини горат“, „Заради гнилиот систем, гниеме млади“, „Рекордери во денови на жалост“, „Младината ни изгоре во корупциски казан“, „Од алчност децата ги претворивте во пепел, а родителите ги завивте во црно“, „Сите години молчење завршуваат со едноминутен молк“, граѓаните го искажаа својот револт и повик на одговорност.

Во знак на почит кон жртвите во пожарот во Кочани, граѓани, најголемиот дел млади луѓе се собраа и на градскиот плоштад во Гостивар.

Собири имаше и во Кочани, Битола, Струмица и други градови.

Во пожарот во дискотеката „Пулс“ во Кочани што избувна за време на настапот на музичкиот бенд „ДНК“ на 16 март загинаа 59 лица, а над 150 се повредени.