Македонскиот јазик е вековна традиција – Свеченост во Гостивар во чест на 5 Мај

Во слава на Денот на македонскиот јазик кој се одбележува на 5-ти мај, и јубилејот 80 години од кодификацијата на македонскиот јазик, попладневно во Гостивар се одржа свечена манифестација. Настанот го организираше Центарот за култура „АСНОМ“ во соработка со гостиварските средни училишта.

„Јазикот е нашиот корен, наш дом, наш пат кон сетот, во него сме скриени, во него се разоткриваме. Нашето невидливо тело и нашата најгласна тишина. Со јазикот се развиваме, созреваме, се стремиме кон она што сме и кон она што сакаме да бидеме. Зборувај, осознавај го, промовирај го убавиот македонски збор, дали е народен, дијалектен-македонски е. Да го сочуваме ова наше непроценливо богатство, јазикот е душата на народот. И додека кажаното некогаш се заборава, пишаниот збор останува вечен“, беше речено на свеченоста.

Македонскиот јазик е вековна традиција што се пренесува со генерации, подвлекоа учениците кои беа дел од културно-уметничката програма, исполнета со рецитации на стихови од познати македонски автори, реферати и фолклор.

Посебен гостин на одбележувањето на празникот беше професорката доктор Лидија Тантуровска од Институтот за македонски јазик „Крсте Мисирков“.

„Благодарност што сум поканета да се обратам на еден ваков ден. По овој повод дозволете да ја издвојам македонската азбука како нешто значајно кога станува збор за македонскиот јазик. За нешто да се чита или прочита, треба да е напишано, а она што го посочуваме да биде прочитано во конкретниот случај е напишано со македонската азбука. Што значи „азбука“? Овој збор потекнува од имињата на првите две букви од најстарото словенско писмо глаголицата, со значење „јас“ „букви“. Буквите во македонската азбука треба да знаат да се знаат да се прочитаат правилно, да се изговараат правилно и да се пишуваат точно“, рече меѓудругото Тантуровска во своето обраќање.

На 5-ти мај во 1945 година, со Решение на Народната влада на Федерална Македонија е усвоена азбуката на македонскиот јазик, а по два месеци Министерството за просвета го озаконило и првиот правопис на македонскиот јазик.

Кодификацијата на современиот македонски стандарден јазик се заокружува со основоположничките дела на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.

Низ историјата македонскиот јазик се запишувал со следните писма:

Глаголица – ранохристијанска азбука; Кирилица – или позната како старомакедонска азбука или црковномакедонска азбука; Илинденска азбука – кирилична поупростена верзија; Македонска преродбеничка азбука – кирилична упростена верзија; Македонска абецедарска азбука – латинична македонска азбука.