Македонските кошаркарски јуниори европски шампиони во „Б“ дивизија, капитенот Јаничиќ прогласен за најкорисен играч на првенството

Јуниорската кошаркарска репрезентација на Македонија ја совлада Австрија во финалето на Европското првенство „Б“ дивизија со 98-88 и го освои пехарот на натпреварувањето кое во изминатиов период се одржуваше во главниот град на земјава.

Македонците беа подобар противник од Австријците во меч во кој целосно доминиравме од почетокот до крајот.

Нашиот национален тим забележа осум победи на осум средби, а покрај над Австрија во финалето, во нокаут-рундата славеше над Португалија и Бугарија, а претходно во групата ги доби Ирска, Кипар, БиХ, Чешка и Украина.

Најдобар стрелец во финалето беше капитенот Никола Јаничиќ со 30 поени, пред Стефан Стојковиќ со 15 поени.

Кај Австрија, Нико Железник даде 21 поен, а Имран Суљановиќ се истакна со 19 поени.

Македонија во следното издание на Европското јуниорско првенство ќе игра во А-дивизијата.

Капитенот на македонската кошаркарска репрезентација, Никола Јаничиќ е прогласен за најкорисен играч на Европското првенство од Дивизијата „Б“. Селекторите на 22-те селекции на собирот на јуниорите од Дивизијата „Б“ одлучија Македонецот да го понесе признанието МВП.

Јаничиќ беше одличен и во финалниот натпревар одигран синоќа во кој Македонија беше подобра од Австрија, и промовирана во шампион на Европското првенство за кошаркари „Под 18“ години. Реализираше 30 поени, пет скока, четири асистенции, исто толку освени и три загубени топки, сето тоа за индекс 31.

Гостиварецот Никола Димитриевски беше дел од стручниот штаб на јуниорската кошаркарска репрезентација, како помошник на селекторот Андреевски.