Мал дел од родителите знаат – За првороденото бебе државата дава парична помош

Околу пет илјади денари изнесува еднократната парична помош за новороденче која државата ја обезбедува на семејството за прво новородено дете. Правото на користење го има еден од родителите, кој мора да е државјанин на Република Македонија со постојано место на живеење во земјава за дете родено на територијата на Македонија.

Според законските одредби како прво новородено дете се смета дете кое е прво живородено дете по ред на раѓање на мајката. За прво новородено дете  ќе се сметаат и децата кога мајката при првото раѓање ќе роди повеќе деца одеднаш (близнаци, тројка и повеќе). Исто така, за прво новородено дете ќе се смета и првото посвоено дете, како и кога ќе се посвојат повеќе деца одеднаш.

Барањето за остварување на правото на еднократна парична помош за новороденче со потребната документација се поднесува до Центарот за социјална работа, најдоцна до наполнети три месеци живот на детето, а за посвоено дете најдоцна до три месеци од заведувањето на посвоеното дете во книгата на родените. Од документи потребни се:лична карта на родителите, мајчина книшка и препис од извод на родени или за посвоено дете – доказ за ред на посвојување.