Малолетниците во Гостивар се‘ почесто посегнуваат по дроги, најмалиот зависник има само 9 години

Загрижувачки податоци за злоупотребите на дрога во гостиварско. Се повеќе тинејџери во Гостивар запаѓаат во канџите на дрогата. Меѓу малолетниците кои земаат наркотици најчести се оние од 15 до 17 години, но во ова зло навлезени се и помали деца. Според податоците на невладината ХЕЛП, која спроведува програма за заштита на корисници на дроги, најмалиот зависник има само 9 години.

Малолетните корисници немаат пристап до лекување и третман, затоа што законски не се опфатени во програмите. Од ХЕЛП нагласуваат дека децата се оставени сами на себе, што е огромен проблем и пречка за шанса да се извлечат од дрогата.

„За жал, возраста на корисници на дроги се намалува, имаме многу случаи под 18 години, а законски не е регулирано прифаќање малолетници и тоа е голем проблем. Голем број од корисниците се малолетни, а ние законски не смееме да ги третираме, работиме само со полнолетни лица. Има иницијатива тоа да се промени, да се опфатат и малолетници, организациите кои се бавиме со оваа проблематика имаме доставено барање до Владата, има позитивни реакции дека ќе се усвои“, рече Зоран Попоски, претседател на ХЕЛП.

Според податоците на организацијата, на подрачјето на Гостивар има околу 630 корисници на разни дроги: марихуана, хероин, кокаин. Градот се уште нема Дневен центар за третман на зависници, па за метадонска терпија мора да патуваат во Тетово, а за посеопфатено лекување во Струмица.

„Околу 40 корисници од Гостивар се вклучени во метадонска терапија преку Центарот во Тетово. За да го земат метадонот секојдневно треба да патуваат до таму, што секако е трошок за нив. Но, проблем е што поголемиот дел се и вработени, па имаат тешкотија да го усогласат терминот, да стасаат навреме за да ја подигнат терапијата. Ние веќе 10 години се бориме во Гостивар да се отвори Дневен центар, се надевам дека во соработка со институциите ќе успееме во тоа“, подвлече Попоски додавајќи дека со силна волја, поддршка и соодветен третман, зависниците може да се излекуваат.

Во тимот на ХЕЛП за помош на зависниците се вклучени теренски и социјални работници како и медицинско лице. Поради пандемијата организацијата периодов работи на повик со закажување на термини, за да се намалат личните контакти и ризикот од коронавирус