Манифестација во чест на Свети Климент во техничкото училиште во Гостивар

„На оваа манифестација го чествуваме големото име, ликот и делото на нашиот сесловенски учител, чудотворец, мислител, верниот ученик на светите браќа Кирил и Методиј, свети Климент Охридски, кој и денес не‘ потсетува на патот кон светлоста. Да се тргнеме од злото, правејќи добри дела!“, ова беше пораката испратена од одбележувањето на празникот 8 Декември, кое денеска се одржа во средното техничко училиште во Гостивар.

Настанот посветен на Свети Климент Охридски се организираше под менторство на професорките од активот по македонски јазик: Гордана Страшевска, Анѓелина Нофитоска и Верица Ефтоска Илиоска.

Свечената програма беше исполнета со рецитации, реферат, настап на културно-уметничкото друштво „Браќа Ѓиноски“, како и претставување на  музички бенд од средношколци од училиштето. „Македонската песна е симбол на заедништво и сполетност! Таа успеа да спплоти наши талентирани ученици, кои преку звуци и строфи денес испраќаат порака за љубов, непокор, за единство“, беше речено на настанот.

Честитајќи го празникот, директорот на училиштето Бесир Салиу во поздравниот говор наведе:

„Нашето училиште ќе продолжи да чекори по зацртаната патека на високообразовани вредности и да дава квалитетно образование, при тоа ќе продолжиме да го негуваме меѓуетничкиот соживот и почит, едни со други“.

Заменик директорот Марјан Пачавровски истакна дека вредностите од минатото треба да се почитуваат и паметат и да бидат пример за иднината.

„Никогаш да не се заборави минатото, кои служи како патоказ за нашата иднина. Голема е личноста нма Свети Климент, во меморијата на Македонецот тој особено се јавува како прв оригинален словенски писател, просветител и втемелувач на писменоста на македонскиот народ. И не само на македонскиот, туку и на сите словенски народи. Поради него, Македонија претставува симбол на словенската писменост и култура. Затоа наша должност е да го чуваме и негуваме името на овој наш значаен просветител“, рече Пачавровски.

На чествувањето во техничкото училише присуствуваа ученици, професори, гости од другите училишта во Гостивар, како и претставници на институции и организации.