Марш за традиционално семејство и Парада за поддршка на ЛГБТИ денес во Скопје

Главниот град денес ќе биде место кадешто ќе се одржуваат два настана со спротивставени цели и пораки: едниот за поддршка на правата на хомосексуалците и трансродовите лица и другиот за промовирање на традиционалните семејни вредности.

„Парадата на гордоста, Скопје Прајд е протестен марш кој има за цел да го сврти вниманието на јавноста кон нееднаквоста со која живеат ЛГБТИ луѓето во нашата земја. Стигмата, неприфаќањето и насилството се нешта со кои ЛГБТИ заедницата секојдневно се соочува и кои мора да се надминат.“, велат од Националната мрежа за борба против хомофобија и трансфобија, организатори на парадата.

Здружението на граѓани Традиционално семејство, пак го организира маршот „Сведоштво ЗА семејството“. „Настанот е насочен кон промовирање и зачувување на традиционалните семејни вредности и против можноста во македонското општество да се пропагира и озаконува неприродното семејство и Џендер идеологијата. Да излеземе заедно и да посведочиме за вистината за тоа што е брак, семејство, пол и заедно, со нашите семејства, да ја започнеме нашата прошетка што сведочи живот“, велат организаторите.

Настаните се со почеток во 12 часот. Парада на гордоста, почнува од паркот „Жена борец“ на ул.„Димитрие Чуповски“, преку  ул.„Васил Главинов“, булеварите „ВМРО“ и „Илинден“ до „Школка“ во Градски Парк.

Маршот „Сведоштво за семејство“ почнува од црквата „Св.Богородица’’ на ул.„Филип Втори Македонски“, преку ул.„11-ти Октомври“, „Димитрие Чуповски“, „Васил Главинов“, до Соборниот храм „Св. Климент Охридски“.

„Поради одржување на овие два настани, сообраќајот ќе биде пренасочен по булевар „Кочо Рацин, ул.„Кирил и Методиј“ ,булевар „Св.Климент Охридски“ и другите околни улици. Апелираме до сите граѓани учесници во сообраќајот да се почитуваат наредбите кои ќе ги даваат униформираните полициски службеници и да ги почитуваат сообраќајните правила и прописи.“, соопшти МВР.