Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

  • Дата: 16/10/2016 | 19:11

Овие раскажувања се  базирани на вистинити факти,меѓутоа некои имиња,ликови и места се (ќе бидат) изменети од драматурски причини.

 

Некогаш не така  одамна постоеше еден град стотина километри и милион години оддалечен од реалноста. Околу градот имаше ограда од едноставни желби и неостварени соништа кои чекаа на шалтерот на животот да ги повикаат да бидат споени со својот сонувач.

Но како што обично и се случува во реалноста не` секогаш сонот успева да го најде својот сонувач. И така некои соништа остануваа засекогаш на крајот од градот заковани на првата патарина како линија која не може да се помине од страна на сонувачите во нереалниот град.

Но имаше и такви кои си го пронајдоа својот сон и некако успејаа да заминат од нереалниот град, некои пак очајни остануваа да вегетираат во рамките на градот како живи подвижни докази дека тука некогаш имало некоја движечка сила, имаше и такви кои својот сон и се’ она што го сакаа од својот живот беше токму тука, во едноставноста на нереалниот град.

Моите раскажувања ќе бидат  една „ временска машина” за нашиот Гостивар, за повозрасната читателска публика ќе биде едно интересно патување а за помладите едно запознавање со градот  Ќе разговараме за разни гостиварски ликови кои во минатото му давале одреден имиџ на нашиот град. Ќе се присетиме на некои минати времиња кога имало огромно количество на позитивна енергија во Гостивар и сите ние сме го славеле нашиот град но ќе се потсетиме и на  моментите кога ѓаволот се шетал по гостиварските улици.

Нашиот Гостивар знае многу нешта и пред нас и за наше време а и  многу е веројатно дека ќе знае и после нас.

За почетокот на нашето патување да се потсетиме на некои ликови кои ќе разбудат некои чувства кај вас почитувани гостиварски читатели.

Вие кои го пронајдовте вашиот сон надвор од Гостивар, вие кои се’ уште сте во потрага по излезот а и вие кои ништо не би менувале во вашето утре, таму некаде околу 2000-та ,плус-минус некои 5 години имаше еден лик кој беше култен за Гостивар и после неговото заминување се почувствува одредена празнина низ гостиварските тротоари. Тогаш, тоа време и сите ние кои бевме дел од тоа време многу добро бевме запознаени со ликот и делото на Митре Партизан. Легендарниот гробар кој свиркаше по гостиварските тротоари и ако некој наседнеше на неговата свирка и се свртеше прашувајќи го :Каде бе Митре?Што ти треба, што свиркаш?-тој ќе ти речеше:Извини што си глупав!!! Значи контра сите општо прифатени норми за урбана легенда Митре беше токму тоа во некои гостиварски сфаќања.

Многу, многу наназад во времето на нашиот град егзистираше платнениот монитор под кровот на гостиварското кино КУЛТУРА, е тука имаше разноразни ликови и случки и беше еден прозорец кон светот кој е надвор од нашиот град. Таму гостиварци од време-навреме доаѓаа да видат нешто поразлично од своето секојдневие но на нашето кино ќе посветиме нешто повеќе внимание во  некое следно временско патување. Ќе се присетиме на ликот  Бирус и на неговото остро око и строг прекор за сите кои за време на кино проекцијата правеа недолични работи  за граѓанин на нереален град во рамките на една нереална социјалистичка земја.

Нашиот град ги имаше и единствените Бале канта заедно со својата сестра Ружа Рушка, деца на народен херој  од НОВ ,со нив двајца  нешто тргнало во погрешен правец, со одредени пречки во нивниот развој тие двајца беа гостиварскиот лумпопролетеријат со кои нашите родители не плашеа кога бевме деца,доколку бевме непослушни,кога не сакавме да јадеме, да учиме, да спиеме…

Гостивар има приказна за раскажување и за Black Forest ,почеток и развој на кој со текот на времето својата моќ ја трансформира во нешто империјалистичко и хегемонско однесување барем кон оние кои мораа својот гостиварски сон да го создаваат со помош на Black Forest.

Гостивар имаше медиуми: ТВ СУКО, ТВ АМ, радио супер Нова,Радио Еми кои беа резултат на едно радио Бонита, радио Га-Га, Гостивар ги имаше Црвен Дожд, Портанигра, Во градот на светлината па се до Ареа. Ги имаше и ЈА ТЕБЕ ТИ МЕНЕ, ги имаше ГЕМИЏИИТЕ, го имаше НИКОЛФЕРТ и многу други специфични и интересни  нешта кои му даваа опис на Гостивар.

Не е поентата да звучам носталгично, можеби е до времето кое заминало и оставило лузна на мојата  перцепција за мојот град, мојот  и вашиот град беше дом на стрип ликови.

Некако се измени(л), кафеана го завеала приматот на повеќето културни институции во градот,многу веројатно на некои од нас-последните мохиканци од  Гостивар ни е шок кога во обид да вдишеш здив од ноќниот живот во градот ќе се најдеме на некое место каде се вртат моменталните хитчиња и кога си дел од некоја јонџа атмосфера каде што испотени  момчиња и девојки со кренати раце слават некои абортус стихови и кога пред очи ти се врти и жмиголи некое тело на малолетна сограѓанка како резултат на ескалирање на музички занес од некоја си „Бела циганка” гледаш и си се прашуваш онака во себе:Имаш ли ти мајка бре дете, татко, брат , сестра или баба, дедо и на крајот Добро бе дете имаш ли ти мозок? Каде  е стихот за љубовта,за морето, за месецината, за првиот бакнеж?-накој треба да се воодушевуваш!

Ама јас пак си велам, можеби е до моите штрафови-за’рѓале, секое време си носи свои херои.

Како и да е, ќе бидеме тука да се присетиме на некогашните ликови како НЕРВ, КАПЕЛО, некои ликови од гостиварското подземје, да ги еволуираме гостиварските славни маала каде живееја гостиварските директори, како пулсираше гостиварскиот тротоар и како се менува(ше) нашиот Гостивар.

Додека ги пишувам овие редови за мојот и ваш убав Гостивар слушам од ТВ како некој порачува дека победува, како некоја будала ескалира со својата тупост и си мислам ако ништо друго барем не е гостиварец, тоа е некако утешително и остава надеж во нас како гостиварци.

Имало и тука разни пропаднати абортуси кои со текот на времето биле во ситуација да решаваат нешто битно за нашиот град но некако сме поминале посуптилно, без некои поголеми штети  по гостиварскиот дух.

И така драги мои гостиварци бидете ми добри, одлични, пред нас се убави нешта, убави дружења.Сакајте се, пијте по некое  кафенце кај комшиите и секогаш чувајте убава мисла во вас.

До следната наша, ракија дружба ве мисли вашиот

®Ban Ki Mun ®!!!