Масовна прослава на Велигден во срцето на Гостивар

Православните христијани точно на полноќ заедно ја дочекаа веста за Христовото воскресение. Се слави големиот христијански празник Велигден. Огромен број верници го исполнија соборниот храм „Пресвета Богородица“ во центарот на гардот како и централното градско подрачје. Според обичаите и традициите, на објавувањето на веста за Христовото воскресение и претходеше трикратниот опход околу црквата со пеење на Воскресение Христе Твое Спасе.

Со биењето на камбаните, се означи Велигден, празникот кога Исус станал од мртвите и ја докажал својата божествена моќ. Граѓаните си честитаа како што налагаат обичаите, со „Христос Воскресна-Навистина Воскресна“ и традиционално се кршеа со велигденските јајца. Одбележувањето на празникот продолжи со утрена и литургија на Свети Јован Златоуст.

Велигден се слави како празник над празниците, победа на животот над смртта.  Црвените велигденски јајца го симболизираат повторно раѓање. Се верува дека тврдата лушпа на јајцето го претставува гробот на Исус, а кршењето на јајцата – воскреснувањето од мртвите. Палењето на свеќите пак е симбол на распространувањето на Исусовата светлина, која никогаш не гасне. По обичај свеќата се носи дома и со неа се пали кандилото.

Верниците го продолжуваат велигденското славење, во кругот на најблиските со семеен ручек и подарување на вапсани јајца.

Богослужбите во црквата продолжуваат и во наредните денови од велигдеснките празнувања.