Матичните лекари со 30 минутен молк пред ординациите во знак на протест

Асоцијацијата за специјализанти и млади лекари најави протестен акт на матичните лекари, денес попладне во знак на револт и незадоволство.

Во соопштението се вели: „Вторник, ден пред избори, ќе стоиме и ќе молчиме пред нашите ординациите од 14 до 14:30 часот. На денот на предизборен молк, ќе молчиме во знак на протест за целата негрижа кон матичните лекари.
Под маската која сами си ја купуваме! Паролата под која ќе стоиме е истата, ја имаме, #ДостаЕ #MjaftMë! Изјави нема да даваме, ниту ќе гостуваме по телевизии, нема потреба од драма таква, драмата е на терен и по болници, има премногу работа! Протестираме против игнорантскиот однос и непостоењето никаква поддршка од почетокот на пандемијата до денес.“.

Матичните лекари бараат итна помош во медицинска заштитна опрема, дезинфициенси и слично, право да упатуваат пациенти на тестирање по нивна процена како лекари, а не алгоритам, да имаат член претставник од матичните лекари во комисија за заразни болести, стопирање на било какви “реформи” најавени за од 01.07, што го сметаат за невиден преседан во сред пандемија и помош во вид на итно ангажирање на млади колеги кои веднаш ќе се вклучат во системот, а во моментов седат дома без работа.