Матичните лекари утре на предупредувачки штрајк

Матичните лекари утре организираат предупредувачки штрајк, за да алармираат за проблемите и потешкотиите со кои секојдневно се соочуваат.

„Предупредувачиот штрајк се состои во тоа што, матичните доктори утре нема да се вклучуваат во системот Мој Термин, нема да се издаваат упати, рецепти, секако нашите амбуланти ќе бидат отворени за пациенти кои имаат итна потреба од помош. Со ова сакаме да скренеме внимание за она што го кажуваме многу години, за нефункционалноста на здравстевниот систем. Матичните амбуланти се доведени на работ на егзистенција поради зголемените сметки, а непроменета капитација, има голем одлив на матични доктори во странство и за нашето упорно барање пациентите да се водат на име на амбуланта. Затоа што кога заминува некој од докторите од амбулантата се кине и капитацијата и вие не можете да ги платите вработените. Овие промени се со цел да може матичните доктори да функционираат, за подобра работа и здравствена услуга за нашите пациенти“, рече во изјава за Канал 5, д-р Лилија Чолакова-Дервишова, претседателка на Здружението на приватни лекари.