Матуранти во Гостивар на протест, бараат скратена верзија на полагање матура

Средношколци од четврта година од средните училишта во Гостивар, кои следат настава на македонски јазик, денес излегоа на мирен протест да искажат незадоволство од полагањето на државна матура. Тие нагласија дека не наишле на слух на барањето воопшто да нема испит, па затоа сега бараат барем да им се овозможи скратена верзија на полагање.

„Пред се‘ изразуваме чувство на гнев, кое е поттикнато од правење на промени во образованиот систем, за кои сметаме дека моментално не треба да бидат ставени пред нашето барање. Во моментов мислиме дека нашето барање треба да се стави во прв план. Откако не добивме никаков одговор на барањето целосно да се укине матурата, направивме компромис и сметаме дека најсолидно и логично решение би било да се усогласиме со скратена верзија. Тоа би подразбирало: полагање на два предмети, од кои едниот би бил мајчин јазик, а вториот изборен предмет, исто така да остане опцијата за проектна задача. Очекуваме разбирање и брз одговор од МОН. Во спротивно ќе преминеме на помасовни протести“, беше речено на протетстот на матурантите во Гостивар.