Матурантите во Гостивар и Тетово на предавања за фер и спортско навивање

Младите од полошкиот регион преку предавања ќе се потсетат на потребата од фер и спортско навивање и коректно однесување на спортски натпревари.

Секторот за внатрешни работи Тетово неделава стартуваше со проектот „Спречување на насилно и недостојно однесување на спортски натпрeвари“, со кој ќе бидат опфатени околу 3.000 ученици од четврта година во сите средни училишта во Гостивар и Тетово.
„Во училиштата се одржуваат посебни работилници, односно предавања, на кои интерактивно учествуваат и родители, училишни психолози и педагози. На нив се дебатира за потребата од фер и спортско навивање на фудбалски или други натпревари, но и за законските импликации доколку се иницира или учествува во насилство пред, за време или по завршување на натпреварите. На предавањата посебен акцент му е ставен на претстојниот квалификациски натпревар помеѓу фудбалските репрезентации на Република Северна Македонија и Република Косово, кој на 26 март годинава ќе се игра во Скопје, а на кој се најавува присуство на повеќе навивачки групи, меѓу кои и од тетовско-гостиварското подрачјe.”, се вели во соопштението од Секторот за внатрешни работи Тетово.