Маврово и Ростуше го прослави Денот на општината

Општина Маврово и Ростуше на пригодна манифестација и со повеќе други активности го одбележа Денот на општината, 4-ти Мај. Централниот настан во спортската сала “Македонија” беше збогатен со културно-уметничка програма на која учествуваа фолклорни секции од општинските училишта, како и познати пејачи на македонска народна песна.

„Чест и задоволство ми е што денес се собравме по 17-ти пат да го одбележиме 4-ти мај, празникот на Општина Маврово Ростуше. После две години период на пандемија, оваа година сме тука на заедничка прослава. Изминатите две години целосно го сменија нашиот начин на живот и работа. Посакувам животот повторно да се врати во нормала, за да можеме непречено да функционираме како единки и институции. Во оваа пригода сакам да им се заблагодарам на сите граѓани кои со своето однесување и почитување на препораките придонесоа за побрзо справување со здравствената криза, како и на сите поединци и институции кои вио периодот на пандемија помагаа во полесно справување со ковид состојбата. Најголема благодарност искажувам на сите здравствени работници и полициски службеници.“, рече меѓу другото во своето обраќање градоначалникот Медат Куртовски.

На поединци и инстутуции им беа доделени плакети, а ученици добија пофалници за постигнати успеси на различни полиња.