Мавровско – Наместо во контејнерите, ѓубрето се фрла околу нив

Несовесни граѓани на подрачјето на мавровскиот регион, ја нагрдуваат глетката и ја загадуваат околината со расфрлање на ѓубрето околу контејнерите, наместо да го оставаат во нив. На повеќе локации поставени се нови контејнери со капак, но жителите и викендашите почесто одбираат да го фрлат своето кесе отпад надвор од контејнерот, отколку да го подигнат капакот.

Вработените во комуналното претпријатие често се соочуваат со таков проблем, и објаснуваат дека контејнерите остануваат празни, додека околу нив има куп ѓубре.

„Навистина е несфатливо зошто некој наместо да го отвори контејнерот и да го фрли ѓубрето внатре, како што треба, го остава надвор. Апелираме до сите, да покажат повисока еколошка свест и да не го прават тоа повеќе.  Исто така, упатуваме апел да се користат специјално наменетите контејнери за пластични шишиња, лименки и стакло кои ги обезбедивме и да се врши селекција на отпадот. Сетоа тоа е за почиста и поздрава животна средина во овој регион, кој има непроценливи природни убавини“, вели директорката на ЈКП „Маврово“ , Александра Матеска.

Изминатиот викенд, претпријатието во соработка со НП Маврово и Општина Маврово Ростуше, организираше голема акција за чистење на сметот околу Мавровското Езеро.