Медицина и гимназија во Гостивар со нови кабинети и други инвестиции

Зимскиот распуст во училиштата во Гостивар се користи за комплетирање на проекти кои треба да ги подобрат условите за настава. Средношколците оваа учебна година наставата ја следат онлајн, но кога ќе се вратат во училишните клупи ќе имаат подобри можности за учење, особено во практичниот дел.

Медицина веќе се поднови со кабинети за практична настава, библиотека и канцеларија за професорите, додека во гимназијата во тек е процедурата за целосно реновирање на 4 кабинети.

Што се однесува до кабинетите во гимназија, тие ќе бидат наменети за предметите, хемија, физика, математика и биологија. Нивната реконструкција и опремување ќе опфатат финансиска рамка од околу 4 милиони денари.

„Направивме неколку зафати, сменивме плочки во ходниците, поставивме лед светла и слично, а во тек е процедурата за реновирање на четири кабинети, што се многу потребни за нашето училиште, на кој проект максимално ќе се посветиме следниот период“, рече Мирсад Исеини, директор на гимназијата во Гостивар.