Меѓаши ги повика политичките партии да не ги злоупотребуваат децата во кампањата

Првата детска амбасада во светот Меѓаши од пилитичките партии побара да ја почитуват Конвенцијата за правата на детето и да ги поштедат децата од политички кампањи и партиски злоупотреби за изборни цели. Во нивниот повик се вели: „Децата не смее да бидат злоупотребени во политички маркетинг, било тоа да е сликање или снимање видеа со нив. Во 1991 година Собранието на Република Македонија ја донесе Декларацијата за заштита на детето од политичка манипулација и злоупотреба. Со неа се забранува секаков вид политичка присила и организирање на децата како инструмент за политички притисок и злоупотреба и изложување на нивната физичка сигурност и здравје. Децата се иднината и надежта на една земја и треба да се мисли на нив кога се делува политички, а тоа се прави со обезбедување на подобри услови за живот, школување, здравствена заштита… а не со нивно користење за да се добијат предизборни поени, фотографирање со нив за да се добијат гласови за изборите. Тоа не смее да си го дозволи ниту еден политичар или кандидат за изборите. Затоа, бараме од политичките партии и кандидатилте на локалните избори за советници и градоначалници да ги почитуват законите и Конвенцијата за детските права“.