Меѓународен ден на театарот, празник на магичниот свет на сцената

На денешен датум, пред 56 години, светот за прв пат го одбележа Светскиот ден на театарот. Иницијативата била покрената на деветиот Светски конгрес на Интернационалниот Театарски Институт на УНЕСКО во јуни 1961 година, а од наредната година 27 март, се слави како Меѓународен ден на театарот. Тогаш во Париз била отворена сезоната на „Театарот на нациите“.

Секоја година се пренесуваат интернационални пораки, кои се преведуваат на повеќе од 20 јазици и им се читаат на гледачите пред претставите во театрите ширум светот. Автор на првата порака во 1962 година бил францускиот писател, сликар и режисер Жан Кокто. Годинава, има четири светски пораки кои ги напишаа: Сајмон МекБарни, театарски и филмски режисер од Велика Британија,  Маја Збиб, театарска режисерка од Либан, Рам Гопал Баџаџ, театарски режисер, театарски и филмски актер, академик од Индија и Вере Вере Лајкинг Гнепо, мултидисциплинарен уметник од Брегот на Слоновата Коска.

Македонската порака ја напиша актерот Сашко Коцев. Пренесуваме дел од неа:

„Колкава е моќта на театарот, каде треба да цели и кој е неговиот краен домет? Како што се тврди дека патриотизмот е последното прибежиште на ништожниците, тогаш одговорно тврдам дека хиперболизирањето на значењето на театарот, односно неговото непотребно мистифицирање или патетизирање е последното прибежиште на неталентираните. Токму затоа сметам дека е нужно потребна негова демистификација. Светскиот ден на театарот е одличен повод токму ние, театарските дејци, да ги симнеме маските ставени на нашите лица и да проговориме за вистината. Да се навратиме, да се потсетиме или да ги освестиме базичните мотиви кои нѐ натерале да се бавиме со оваа професија“.