Месечно на гостиварското подрачје има по околу 260 вработувања

Според податоците од Агенцијата за вработување на Република Македонија, во првата половина од оваа година, во поширокиот гостиварски регион биле регистрирани вкупно 1.582 пријави за засновање на работен однос. Од нив 1043 биле на неопределено време, а останатите времени или сезонски вработувања. Поголемиот дел од оние кои нашле работно место (885) претходно не биле евидентирани на листата на невработени во Агенцијата.

Во просек на гостиварското подрачје се остваруваат по 260 вработувања месечно. Гледано поединечно по месеци, најмногу пријави за работни односи имало во јануари 313, а најмалку во мај – 228.

Доколку се задржи истото темпо, годината ќе се заокружи со над 3.000 вработувања. Во 2017 година, беа засновани 2.759, а во 2016 вкупно 3.391 работен однос.

Оваа статистика се однесува на трите општини: Гостивар, Врапчиште и Маврово-Ростуше.