Микрорастенија, моќна храна на иднината

Одгледувањето микрорастенија во последниве години станува се повеќе популарно во светот. Станува збор за млади растенија во висина од 5 до 10 cm составени од изданок, со првиот пар на листови. Можат да бидат во зелена, жолта, црвена, виолетова боја, имаат специфична арома и интензивен вкус на слатко, кисело, неутрално или пикантно.

Микро-зеленчукот е побогат со хранливи состојки четири до четириесет пати повеќе од култивираните растителни видови и има големо влијание врз исфрлањето на отрови и тешки метали од телото, како и за зајакнување на имунитетот. Содржат витамини (Ц, Е и К), како и минерали, влакна, аминокиселини и протеини.

Микрорастенијата може да се јадат како свежа салата или како додатоци во сендвичи и готвена храна. Едноставно може да се изблендираат во свежо смути или од нив да се исцедат сокови.

Според Европската Агенција за безбедност на храна дневните потреби за консумација на витамини кај возрасно лице со просечна телесна маса изнесуваат 60 mg витамин C, 13 mg витамин Е и 70 μg витамин К. Научните истражувања покажуваат дека само неколку грама од различни микрорастенија можат целосно да ги задоволат дневните потреби од витамините C, Е и К кај човекот. Научно е докажано дека човекот може да ја исполни дневната препорачана доза на витамин C ако внесе само 41 g црвена микрозелка. Дневните потреби од витамин Е кај човекот се исполнуваат со внесување само на 15 g микроротквица, а 17 g микроамарант би биле доволни за да се исполнат дневните потреби од витамин К.