Минималната плата едвај стасува за храна и пијалоци, да се турне месецот требаат најмалку 550 евра

За да го преживее месецот на едно просечно четиричлено семејство во земјава, потребни му се минимум 33.696 денари. Толку е вредноста на минималната синдикална кошница со основните трошоци за живот, што ја пресмета Сојузот на синдикати, а се однесува на декември месец 2020-та година.

Трошоците за храна и пијалоци изнесуваат 14.078, што е многу блиску до минималната плата, чија сума е определена на 15.000 денари. За домување, каде спаѓаат комунални трошоци и покуќнина треба да се издвојат 10.817 денари. Ова се двете ставки со највисоки износи. Останатите како облека и обувки, превоз, хигиена, култура и здравје имаат трошоци од 734 до 2.464 денари.