Минималната плата ќе биде 18.000 денари од вториот квартал годинава, најави Бектеши

„Минималната плата во текот на 2022 година ќе се зголеми минимум на 18.000 денари. Согласно проекциите и анализите кои се направени тоа ќе се случи најверојатно во вториот квартал од годинава“, изјави денес министерот за економија Крешник Бектеши.

Прашањето за минималната плата ќе се разгледува на средба меѓу Сојузот на синдикати на Македонија и Владата најавена за 24 јануари.

Од синдикатот бараат итно зголемување на минималната плата на 18 илјади денари и скалесто зголемување на сите останати плати, а нивно барање е и утврдување на правото на регрес во јавниот сектор.

На средбата, како што информираат од синдикатот, ќе се разговара и за примената на законот со кој недела е прогласен за неработен ден затоа што од страна на одредени работодавачи се крши законот за што од страна на ССМ се доставени претставки до Трудовниот и Пазарниот инспекторат.

„ССМ јавно укажува дека отстапки нема да има и доколку прашањата не бидат решени преку социјален дијалог веднаш, ССМ ќе го повика работникот и членството на генерален сеработнички штрајк“, стои во соопштението од ССМ.