Министерката за култура во Тресонче: Со 5,3 милиони денари старото училиште ќе прерасне во современ мултифункционален културен центар

Основното училиште „Димитар Ормански“ во Тресонче – родното село на познатиот македонски иконописец, фрескосликар и претставник на Дебарската школа, Дичо Зограф, ќе се ревитализира во мултифункционален културен центар, со капитални дотации од Министерството за култура во износ од 5,3 милиони денари.

Министерката за култура Бисера Костадиновска-Стојчевска заедно со градоначалникот на Маврово Ростуше Медат Куртовски денес беше во Тресонче.

„Старата училишна зграда во најстарото мијачко, а со тоа и малореканско село, ќе прерасне во репрезентативен објект каде што ќе се одржуваат многубројни културни настани. Му честитам на градоначалникот на Општина Маврово и Ростуше, Медат Куртовски, кој во конкурсот за капитални дотации препозна вистинска можност за да направи нешто вредно за жителите на својата општина. Особено е важно што тоа го правиме во годината кога се одбележуваат 150 години од смртта на Дичо Зограф, кој е еден од водечките зографи на Дебарската школа и еден од најпознатите иконописци и фрескосликари на Балканот во XIX век. Оваа година се одбележуваат и 100 години од смртта на зографот Аврам Дичов, кој е  претставник на Дебарската зографска школа и син на Дичо Зограф. Преку овој мултифункционален центар ќе се активираат најразлични содржини кои ќе ја афирмираат културата на регионот и ќе привлечат поголем број гости. Преку овие активности создаваме соодветен дом за честување на делото на Дичо Зограф, но и репрезентативен изложбен простор, место за одржување семинари, и воопшто место каде што ќе го негуваме уметничкото наследство на овој прочуен зограф. Со обновата на старото училиште ќе се создадат и достоинствени услови за сите учесници на традиционалната меѓународна школа „По патеките на Дичо Зограф“, која се одржува во Тресонче секоја година.“, истакна министерката.