Министерот ќе ги замоли МПЦ и ИВЗ да апелираат граѓаните да седат дома за празниците

Министерот за здравство, Венко Филипче во гостувањето во „Само интервју“ на Канал 5 истакна дека сите чинители треба сериозно да ја сфатат ситуацијата, а верските лидери  да ги повикаат своите верници да останат дома за време на престојните празнувања.

„Многу е битно сега и верските лидери да сфатат дека ситуацијата е навистина сериозна, дека епидемиолошката слика може дополнително да ја искомплицира состојбата во болниците, нешто што сите сакаме да го избегнеме. Би сакал да ги повикам следната недела двајцата лидери и на МПЦ и на ИВЗ и да ги замолам да упатат апел кон своите верниците да останат дома оваа година, нека седат дома после ифтарите, да не се групираат во цркви и џамии, да нема повици да се посетуваат служби. Многу е битно сега сите да се вклучиме, не само ние што ги менаџираме здравствените капацитети и политичките чинители, туку и верските. Ова ќе биде сериозен ризик и зависно од тоа како ќе се одвива ситуацијата со бројките, од проценката на ризикот што може да ни се случи, ќе донесеме одлука во следните две недели за тоа како ќе ги димензионираме мерките“, рече Филипче.