Министерот Шаќири: Ембла од Гостивар е среќна на училиште, заедно со другарчињата

Министерот за образование и наука, Јетон Шаќири попладнево преку фејсбук, се огласи за случајот со Ембла Адеми од Гостивар, ученичка со Даунов синдром, кој ја разбранува јавноста неодамна.

„Туку што добив убава вест од родителите на малата Ембла од Гостивар, девојчето кое поради предрасуди кај возрасните, беше спречена наставата во второто полугодие да ја започне нормално како и сите нејзини врсници.

Предизвикот со кој оваа четвртоодделенка, нејзините родители, но и целото општество се соочивме е надминат. Ембла е среќна на училиште! Заедно со другарчињата од класот напредува секој ден, успешно извршувајќи ги сите обврски кои ги наложува процесот на едукација. Таа има голема поддршка од наставниот и стручниот кадар и што е најважно, повеќе нема поделби во училницата. Прифатена е и добива целосна поддршка од соучениците. Ова го видов во видеото кое го добив и многу ме расположи на крајот од оваа напорна работна недела. Драго ми е што свеста за учениците со посебни потреби се менува на подобро! Одиме понатаму. Сите заедно градиме инклузивно општество кое гарантира место и еднакви можности за секого.“, напиша министерот.