Министерот за здравство најави почеток на вакцинацијата против грип

Имунизацијата на населението против сезонски грип во Македонија годинава ќе се спроведе со 41.000 дози вакцини. Министерот за здравство, Венко Филипче, денеска на прес-конференција во Министерството најави дека вакцинацијата ќе започне од утре, 5 ноември во сите Центри за јавно здравје во земјава.

Новина е што лицата над 65 години со просечна и потпросечна пензија (помала од 14.480 денари), како оние што немаат пензија можат да добијат бесплатна вакцина, за што се набавени 28.000 дози. „Годинава им помагаме на граѓаните на кои им е најмногу потребна вакцината. Вакцинацијата не е задолжителна, но ја препорачуваме за лица над 65 години, како и за другите со хронични болести, но и здравствени работници и други лица во здравствен ризик“, потенцираше Филипче.

За да добијат бесплатна вакцина пензионерите кои ги исполнуваат условите, со чек од својата пензија треба да се обратат кај матичниот лекар, кој пак преку „Мој термин“ ќе им закаже термин за вакцинација. Пензионерите над 65 години кои не земаат пензија, ќе можат да се вакцинираат со потврда од ПИОМ.

Сите останати лица, кои сакаат да се вакцинираат, тоа може да го направат во Центрите за јавно здравје, без закажување, а вакцијата ќе ја платат по цена од 650 денари.