Министерство за здравство: Плус 5% повисоки плати за здравствените соработници

Министерството за здравство најави дополнително зголемување на платите од 5% за соработниците во секторот на јавното здравство, коешто ќе започне од јуни 2020 година.
„Јавното здравство во текот на 2019 и со тоа што ќе следи во тековната година добива рекордно зголемување на платите во сите сектори. Здравствените кадри за првпат во постоењето на државата добиваат толку покачувања на платите и бенефиции и се инвестира во подобрување на нивниот статус. Вложувањето во здравствените кадри е со цел да се мотивираат и јавното здравство на Македонија да има квалификуван и професионален медицински кадар што е еден од основните услови за квалитетно здравство.“, соопшти Министерството.
Од таму нагласуваат дека со најновите измени и дополнувања во Колективниот договор за здравствена дејност се прави значително зголемување на коефициентот на сложеност и на додатокот на плата за дежурства.
Основната плата на лекарот специјалист е зголемена за 40%, на медицинските сестри до 23%, на општите лекари 25% и 15% на останатите здравствени соработници, заклучно со февруари 2020 година. За 15% е зголемен капитациониот бод на матичните лекари од општа пракса, педијатрија, гинекологија и стоматологија, а на терциерно ниво се одобрија повеќе од 1000 специјализации и супспецијализации.