Министерството за транспорт одзема 97 лиценци согласно Законот за градење

Министерството за транспорт и врски изврши контрола на 643 од над 1.100 издадени лиценци за работа согласно Законот за градење и Законот за урбанистичко планирање. При контролата било утврдено дека 97 правни лица повеќе не ги исполнуваат законските услови за поседување на лиценците, информира денеска министерот за транспорт Александар Николоски.

Како што соопшти на прес-конференција, досега се донесени решенија за одземање на:

• 13 лиценци А за изведувач на градби од прва категорија,
• 34 лиценци Б за изведувач на градби од втора категорија,
• 2 лиценци А за надзор над изградба на градби од прва категорија,
• 6 лиценци Б за надзор над изградба од втора категорија,
• 3 лиценци А за проектирање на градби од прва категорија,
• 20 лиценци Б за проектирање на градби од втора категорија,
• 2 лиценци Б за ревизија на проектна документација,
• 1 лиценца за управител за одржување објекти од прва и втора категорија и
• 16 лиценци за изработка на урбанистички планови.

– Министерството во моментов спроведува контрола на сите лиценци издадени согласно Законот за градење и Законот за урбанистичко планирање. Законите за контрола не се јасни и не се исклучиви и затоа контролата сега се прави врз основа на политичка одлука, а по завршувањето на постапките ќе следат законски измени со кои ќе има обврска на секои шест месеци да се врши контрола на се што е издадено од страна на институциите, рече Николоски.