Министрите од регионот се координираат за границите – ќе се изработува заеднички протокол

Вкупната бројка на Ковид дијагностицирани во нашата земја од почетокот на пандемијата изнесува 14.004, оздравени се 10.722 пациенти, починати се 585, а во моментов бројот на активни случаи во земјата изнесува 2.697.

Министерот за здравство Венко Филипче вчера учествуваше на видео конференција со колегите министри од регионот на тема „Ковид-19 во земјите од Западен Балкан, Грција и Бугарија“. Ќе се изработува заеднички протокол за границите.

„Потребен е координиран пристап за границите – да се овозможи слободен премин, но и контрола над состојбата со вирусот. Ова е заклучокот од денешната видео конференција која ја иницирав на тема Ковид-19 со земјите од Западен Балкан, Грција и Бугарија. Се договоривме да изработиме иницијален документ на взаемен протокол за границите. На документот ќе работи работна група составена од членови од сите земји на Западен Балкан, Грција и Бугарија. Следната видео конференција на која ќе дискутираме за протоколот ќе ја одржиме, најдоцна, за две недели.“, соопшти Филипче.